25.01.2025. » 10:51
Kampi Rinorë: Ndërtimi i urave midis kulturave
Në një botë ku dallimet mes grupeve të ndryshme shpesh theksohen dhe përçojnë ndasi, një kamp rinor mund të duket si thjesht një mundësi për të kaluar disa ditë larg rutinës shkollore. Por për ne si pjesëmarrës të kampit “Youth Camp”, kjo përvojë ishte më shumë se kaq, ishte një mundësi për të ndërtuar ura të reja ndërmjet kulturave, për të kapërcyer pengesat gjuhësore dhe kulturore dhe për të krijuar lidhje që tejkalojnë paragjykimet dhe stereotipet.
Tematika e kampit ishte e qartë dhe kishte të bënte me thyerjen e barrierave dhe krijimin e lidhjeve mes komuniteteve të ndryshme, përfshirë shqiptarët, serbët, romët, ashkalinjtë dhe grupe të tjera që shpesh janë të ndarë nga historia, gjuha dhe kultura., dhe aktivitetet që u zhvilluan gjatë kampit luajtën një rol të jashtëzakonshëm në arritjen e këtij qëllimi.
Një nga momentet më të paharrueshme të kësaj përvoje ishte kuizi, ku grupet u ndanë sipas kombinimeve të pjesëmarrësve nga grupe të ndryshme etnike dhe kulturore. Ky aktivitet i kërkoi çdo individi të bashkëpunonte me ata që nuk i njihte më parë, t'i dëgjonte ata që flisnin një gjuhë tjetër dhe të lidhej përmes idesë së ndihmës dhe mbështetjes. Në këtë mënyrë, edhe barrierat gjuhësore që mund të ishin një pengesë në fillim, u shndërruan në mundësi për t'u njohur dhe për të mësuar për njëri-tjetrin. Një aktivitet tjetër që e theksoi këtë ide të bashkëpunimit ishte "mesazhi me sy mbyllur". Ky ishte një aktivitet që kërkonte që pjesëmarrësit të komunikonin dhe të kalonin mesazhe pa përdorur fjalë, por vetëm me shenja, ndërveprime dhe bashkëpunim.
Një nga aspektet më të rëndësishme që karakterizoi kampin ishte laramania e aktiviteteve. Nga lojëra dhe trajnime deri te diskutime dhe prezantime, gjithçka u krijua në mënyrë që pjesëmarrësit të mos ndiheshin të mbyllur në një rutinë monotone dhe cdo ditë ishte një mundësi e re për të mësuar gjëra të reja.
Kjo larmi e aktiviteteve na ndihmoi të shmangnim monotoninë dhe të krijonim një atmosferë pozitive dhe bashkëpunuese. Përfundimisht, kampet rinore si ky janë thelbësore për ndërtimin e urave ndërmjet grupeve dhe komuniteteve të ndryshme. Kur të rinjtë mund të takojnë dhe të bashkëpunojnë me individë nga grupe të ndryshme, ata shohin përtej paragjykimeve dhe formojnë një vizion më të hapur dhe më të kuptueshëm për botën. Aktivitetet e tilla janë më shumë se një mundësi për argëtim, ato janë mundësi për t'u mësuar të jemi më të hapur dhe më të duruar, dhe për të ndihmuar në krijimin e një shoqërie më të bashkuar dhe të qëndrueshme.
Përvoja ime në kampin "Youth Camp" më ka lënë me një ndjenjë të thellë të shpresës dhe besimit në forcën e bashkëpunimit dhe komunikimit. Duke ditur ndarjet e shpeshta që bëhen, këto kampime rinore përfaqësojnë një hap të vogël, por shumë të rëndësishëm, drejt ndërtimit të një të ardhmeje më të bashkuar dhe më të qëndrueshme.
Drenisha Zeqiri
Lajmet e fundit
