Projekti u prezantua nga Stefan Kalaba nga OJQ ACDC, i cili theksoi rëndësinë e kësaj nisme për përmirësimin e cilësisë së burimeve ujore dhe forcimin e bashkëpunimit multietnik në komunat veriore të Kosovës.
Në diskutim morën pjesë edhe Ljubiša Mijačiq, ekspert i jashtëm dhe studiues, si dhe Faruk Mujka, drejtor i përgjithshëm i Ndërmarrjes Publike Ibër-Lepenc. Ata theksuan rëndësinë e identifikimit të ndotësve, mbrojtjen e lumenjve, përfshirjen e të rinjve dhe komuniteteve lokale në mbrojtjen e mjedisit, si dhe nevojën për kujdes të përbashkët të të gjitha komuniteteve.
Qëllimet e projektit
Projekti “Së bashku për lumenj të pastër” synon ruajtjen dhe përmirësimin e cilësisë së burimeve ujore, identifikimin e burimeve të ndotjes dhe zhvillimin e rekomandimeve për mbrojtjen e ekosistemit. Përveç aktiviteteve kërkimore dhe hartimit të Kadastrës së ndotjes, parashikohen punëtori dhe aksione ekologjike që do të përfshijnë qytetarët dhe të rinjtë në mbrojtjen aktive të lumenjve.